હોલીવુડમાં ફીમેલ લીડવાળી એક્શન ફિલ્મોની ખૂબ ચર્ચા થાય છે. ફેન્સ અને ક્રિટીક્સ પણ તેને ખૂબ પસંદ કરે છે. હવે બોલિવૂડ પણ આ ફિલ્મોમાં પાછળ નથી. રીપોર્ટસ પ્રમાણે ટૂંક સમયમાં જ કેટરિના કૈફ અને વિદ્યા બાલન પહેલીવાર એક સાથે સ્ક્રીન શેર કરતી જોવા મળશે. આ ફિલ્મ એક એક્શન કોમેડી ફિલ્મ હશે જેને આનંદ એલ રાય પ્રોડ્યુસ કરશે.એવું કહેવામાં આવી રહ્યું છે કે અનિરુધ ગણપતિ આ ફિલ્મનું ડાયરેક્શન કરશે. ડિરેક્ટર તરીકેની આ તેની ડેબ્યુ ફિલ્મ હશે. તે લાંબા સમયથી રાયના પ્રોડક્શન હાઉસ સાથે સંકળાયેલ છે.
અહેવાલો અનુસાર, અનિરુધ ફિલ્મ ‘ઝીરો’ના આસિસ્ટન્ટ ડાયરેક્ટર હતા અને તે જ સમયે તેણે પ્રોજેક્ટ માટે કેટરીનાનો સંપર્ક કર્યો. અભિનેત્રી પણ આ માટે સહમત થઈ, જ્યારે ટીમે આ જ ફિલ્મ માટે વિદ્યાનો સંપર્ક કર્યો. ફિલ્મની સ્ક્રિપ્ટ તેના અંતિમ તબક્કામાં છે.તાજેતરમાં જ ‘સૂર્યવંશી’ના શૂટિંગ દરમિયાન કેટરિનાએ પોતાની ઈચ્છા વ્યક્ત કરી હતી કે તે ફીમેલ કોપનો રોલ કરવા માંગે છે. આગામી પ્રોજેક્ટ દ્વારા તેનો ડ્રીમ રોલ કરવાનું સપનું પૂર્ણ થઈ શકે છે. પ્રોફેશનલ ફ્રન્ટની વાત કરીએ તો કેટરિના હાલમાં અક્ષય કુમાર સાથે ‘સૂર્યવંશી’ ફિલ્મનું શૂટિંગ કરી રહી છે. તે જ સમયે, વિદ્યા બાલન હવે શકુંતલા દેવીની બાયોપિક પર કામ કરી રહી છે.
