ફિલ્મ વોરની સફળતા બાદ વાણી કપૂર આગામી ફિલ્મની તૈયારીમા પડી ગઇ છે. આ વખતે તેનો કો-સ્ટાર રણબીર કપૂર છે. બન્ને સાથે ફિલ્મ શમશેરામાં જોવા મળશે. રણબીરથી પ્રભાવિત થયેલી વાણી તેના વખાણ કરતા અચકાતી નથી. વાણી કપૂરે જણાવ્યું હતું કે તે પોતે એક સુપરસ્ટાર હોવાનો ભાર લઇને ફરતો નથી. તે એક સામાન્ય અને ચીલ અભિનેતા છે. તેથી મને તેની સાથે કામ કરવામાં બહુ સહજતા લાગે છે. સેટ પર પણ તેની વર્તણૂક ભારીભરખમ ન રહેતા સામાન્ય હોય છે. નોર્મલ સાથેસાથે તે રમૂજી પણ છે. તેથી સેટ પર પણ વાતાવરણ હળવું રહે છે. એના સ્વભાવથી હું એટલી બધી પ્રભાવિત થઇ ગઇ છું કે, મારો પણ આવો જ સ્વભાવ હોય તેમ મને થાય છે .
રણબીર કપૂરની વાત કરીએ તો રણબીર કપૂરની ઘણી ફિલ્મો 2020 માં રિલીઝ થઈ રહી છે, જેમાં તે એક અલગ અવતારમાં જોવા મળશે. એક તરફ તેમની પાસે અયાન મુખર્જીની ફિલ્મ ‘બ્રહ્માસ્ત્ર’ છે, તો બીજી બાજુ તે ‘શમશેરા’માં જોવા મળશે. આ ફિલ્મમાં રણબીર ઘણા એક્શન સીન્સ અને સ્ટન્ટ્સ કરતો જોવા મળશે. શમશેરા એક એક્શન-એડવેન્ચર ફિલ્મ છે, જેમાં રણબીર ઉપરાંત વાણી કપૂર અને સંજય દત્ત પણ જોવા મળશે. આ ફિલ્મને કરણ મલ્હોત્રા ડિરેક્ટ કરી રહ્યા છે.
