આયુષ્માન ખુરાનાની અપકમિંગ ફિલ્મ ડ્રીમગર્લનું ટ્રેલર અને ગીતો લોકોને ખૂબ જ પસંદ આવી રહ્યા છે. આયુષ્માનના હટકે રોલથી ફેન્સ પણ ખુશખુશાલ છે અને હવે બધા જ ફેન્સ પૂજાને ઓનસ્ક્રીન મળવા માટે તૈયાર છે. આયુષ્માન ખુરાના અને નુસરત ભરૂચા હાલ ફિલ્મના પ્રમોશનમાં વ્યસ્ત છે. બંને એક્ટર્સ દેશભરમાં ફરીને પોતાની ફિલ્મને પ્રમોટ કરી રહ્યા છે.ત્યારે પ્રમોશનના ભાગરૂપે જ આ જોડી ગુજરાત પણ આવી રહી છે. આયુષ્માન ખુરાના અને નુસરત ભરૂચા ગુજરાતમાં જન્માષ્ટમી ઉજવવાના છે. આયુષ્માન અને નુસરત વડોદરામાં દહીં હાંડી કરશે. વડોદરાની પારુલ યુનિવર્સિટીમાં ગુરુવારની બપોરે આ બંને સ્ટાર્સ જન્માષ્ટમી ઉજવશે.
ડ્રીમ ગર્લમાં આયુષ્માન ખુરાના ફિલ્મમાં એક કોલ સેન્ટરમાં કામ કરે છે જે છોકરીના અવાજમાં કોલર્સને લુભાવે છે. આ સિવાય આયુષ્માન ફરી રામલીલામાં નોટંકી કરતા જોવા મળશે. ફિલ્મનું ડિરેક્શન રાજ શાંડિલ્યએ કર્યું છે જ્યારે પ્રોડક્શન એકતા કપૂરે કર્યું છે.આયુષ્માન ખુરાના તેની ફિલ્મોના અનોખા કોન્સેપ્ટ માટે જાણીતો છે. વિક્કી ડોનર હોય કે બધાઈ હો, અંધાધૂન હોય કે આર્ટિકલ 15 દર્શકોને હમેશા નવા કોન્સેપ્ટ સાથે રૂબરૂ કરાવે છે હાલમાં એક ઈન્ટરવ્યુમાં વાત કરતા કહ્યું હતું કે, ફિલ્મના 25 ટકા ભાગમાં તેણે છોકરીના અવાજમાં વાત કરી છે જો કે રેડિયો બેકગ્રાઉન્ડ હોવાના કારણે તેને આ માટે કોઈ મુશ્કેલી પડી નહીં.
