ગીર સોમનાથમાં મધમાખીના અણધાર્યા હુમલામાં 20થી વધુ વિદ્યાર્થીઓ ઘાયલ થયાના અહેવાલ સામે આવ્યા છે. મધમાખીઓએ આ તમામ વિદ્યાર્થીઓને ડંખ માર્યા છે. ચાલુ ક્લાસે અચાનક જ મધમાખીનું ઝુંડ ક્લાસમાં ઘુસી આવ્યુ હતું. જેના પગલે નાસભાગ મચી જવા પામી હતી. વિદ્યાર્થીઓ અને શિક્ષકો તમામ આ અણધાર્યા માખીના હુમલાથી હતપ્રત થઈ ગયા હતા.
મધમાખીએ કેટલાક વિદ્યાર્થીઓને ડંખ મારતા તેમને હોસ્પિટલ ખસેડવાની ફરજ પડી હતી. મળતી માહિતી મુજબ, ઉના: ઉનાના અમોદ્રા રોડ પર આવેલી ગુલીસ્તા સ્કૂલમાં ચાલુ ક્લાસે ઝેરી મધમાખીનું ઝુંડ ઘૂસી જતા વિદ્યાર્થીઓમાં અફરાતફરી મચી હતી. 20થી વધુ વિદ્યાર્થીઓને ઝેરી મધમાખીએ ડંખ મારી લેતા સારવાર માટે તમામને ઉનાની સરકારી હોસ્પિટલમાં ખસેડ્યા હતા.
સ્કૂલની પાસે આવેલી નાળિયેરીના ઝાડમાં ઝેરી મધમાખીનું ઝુંડ રહેતું હતું. આ અંગે સ્કૂલ દ્વારા વન વિભાગને જાણ પણ કરવામાં આવી હતી છતાં કોઇ કાર્યવાહી ન કરતા આજે વિદ્યાર્થીઓના જીવ પર જોખમ આવ્યું છે. આથી વાલીઓ અને વિદ્યાર્થીઓમાં રોષની લાગણી જોવા મળી હતી.
