રાજકોટમાં આજે કાલાવડ રોડ પર બે અકસ્માત થયા છે. પહેલા બનાવમાં કોસ્મોપ્લેક્સ સિનેમા પાસે પૂરપાટ ઝડપે આવતી ફોર્ચ્યુનર કારે એક્ટિવા ચાલકને અડફેટે લીધો હતો, જેમાં એક્ટિવા સાથે યુવાન પાંચ ફૂટ હવામાં ફંગોળાઇને રસ્તા પર ધડામ કરતો પટકાયો હતો. એક્ટિવા ચાલક યુવાનના ઘરે લગ્નપ્રસંગ હોવાથી કંકોત્રી આપવા જતો હતો. ત્યારે અકસ્માત નડતાં તેને ગંભીર હાલતમાં હોસ્પિટલ ખસેડાયો હતો, જેમાં સારવાર બાદ તેનું મોત નીપજ્યું હતું.
આ ઘટનામાં ત્રણ બહેને એકનો એક ભાઈગુમાવ્યો છે. આ સમગ્ર ઘટના સીસીટીવીમાં કેદ થઈ છે. મનીષ તેરૈયા નામનો 27 વર્ષીય યુવાનનું પિતરાઈ બહેનના લગ્નની કંકોત્રી આપવા માટે જઈ રહ્યો હતો. એ દરમિયાન ફોર્ચ્યુનર કારે તેને અડફેટે લીધો હતો, જેમાં હોસ્પિટલમાં ટૂંકી સારવાર દરમિયાન તેનું મોત નીપજ્યું હતું. મૃતક યુવક નિવૃત્ત પીઆઇ ભૂપતભાઇ તેરૈયાના પુત્ર હોવાનું પણ જાણવા મળ્યું છે.
