2024ની લોકસભા ચૂંટણીમાં ભાજપને પૂર્ણ બહુમતી મળી નથી. આ કારણે નરેન્દ્ર મોદીએ હવે નીતિશ કુમાર અને ચંદ્રાબાબુ નાયડુની પાર્ટીઓના સમર્થનથી સરકાર ચલાવવી પડશે. હજુ સુધી સરકારની રચનાને લઈને કોઈ રૂપરેખા નક્કી કરવામાં આવી નથી, પરંતુ નીતિશ કુમારની પાર્ટીએ પહેલા જ તીર છોડ્યું છે. જેડીયુના પ્રવક્તા કેસી ત્યાગીએ ગુરુવારે સેનામાં સૈનિકોની ભરતી માટે અગ્નિવીર યોજનામાં ફેરફારની માંગ કરી હતી. તેમણે કહ્યું, ‘અગ્નવીર યોજનાનો ઘણો વિરોધ થયો હતો અને તેની અસર ચૂંટણીમાં પણ જોવા મળી હતી. તેથી, અગ્નિવીર યોજના પર ફરીથી વિચાર કરવાની જરૂર છે.
કેસી ત્યાગીએ ‘આજ તક’ સાથે વાત કરતા કહ્યું કે જ્યારે આ સ્કીમ લાવવામાં આવી ત્યારે લોકોએ ખૂબ વિરોધ કર્યો હતો. સેનામાં તૈનાત લોકોના પરિવારજનો પણ આનાથી નારાજ હતા. તેથી આમાં ફેરફાર થવો જોઈએ. જ્યારે યુનિફોર્મ સિવિલ કોડના મુદ્દે પૂછવામાં આવ્યું તો નીતિશ કુમારની પાર્ટીએ કહ્યું કે અમે તેના સમર્થનમાં છીએ. પરંતુ આ અંગે અમારી માંગણી એ છે કે તમામ સંબંધિત પક્ષોનો અભિપ્રાય લેવામાં આવે. આ પછી જ કોઈ નિર્ણય લેવો જોઈએ. કેસી ત્યાગીએ કહ્યું કે આ અમારું સ્ટેન્ડ પહેલા પણ હતું અને અમે આજે પણ તેની સાથે છીએ.
તેમણે એક દેશ, એક ચૂંટણીના મુદ્દે સમર્થનની વાત પણ કરી હતી. જેડીયુએ કહ્યું કે અમે પહેલા પણ આ મુદ્દે સાથે હતા. નોંધનીય છે કે લોકસભા ચૂંટણીમાં ભાજપને 240 બેઠકો મળી છે, જ્યારે જેડીયુને 12 બેઠકો મળી છે. આંધ્ર પ્રદેશની ટીડીપીને 16 બેઠકો મળી છે. હવે ભાજપ આ બંને પક્ષોના સમર્થનથી સરકાર બનાવવાની સ્થિતિમાં છે. એવા સમાચાર છે કે નરેન્દ્ર મોદી 8 અથવા 9 જૂને PM તરીકે શપથ લઈ શકે છે. સરકારની રચનાને લઈને દિલ્હીમાં ભાજપના ટોચના નેતાઓની બેઠક પણ ચાલી રહી છે.
