એક તરફ રાજ્યના લોકો કોરોના વાયરસ સામે લડી રહ્યા છે, ત્યારે બીજી તરફ હવે ગુજરાતમાં ગરમીએ લોકોના હાલ બેહાલ કર્યા છે. કોરોના વાયરસની મહામારી વચ્ચે હવે ગરમીનું પ્રમાણ વધતા જોવા મળ્યું હતું. તેવામાં મહેસાણામાં ૪૦ ડિગ્રી મહત્તમ તાપમાન નોંધાયુ હતું. સૂર્યદેવતા આકાશમાં ઉદયમાન થાય છે, ત્યારથી ધીમે ધીમે વાતાવરણમાં ગરમીનું પ્રમાણ વધવા લાગે છે. જેમાં બપોર સુધીમાં વધારો થતા મહેસાણા વાસીઓને અસહ્ય ઉકળાટ સાથે ભારે ગરમીનો સામનો કરવો પડી રહ્યો છે.
મહેસાણામાં તાપમાનનો પારો ૪૦ ડિગ્રી સુધી પહોચી ગયો હતો. જેના કારણે લોકોએ વધતી જતી ગરમીનો અનુભવ કર્યો હતો. જ્યારે ન્યૂનતમ તાપમાન ૨૫ ડિગ્રી નોધાયુ હતું. બપોરના સમયે જાણે અગ્નિવર્ષા થતી હોય તેવી ગરમી જોવા મળી હતી. તો પવનની ગતિ ૧૬ કિલોમીટર પ્રતિ કલાકની રહેવા પામી હતી. જેના કારણે લોકો ઘરમાં રહેવાનું પંસદ કરી રહયા છે. તેથી મહેસાણાનાં રસ્તાઓ સૂમસામ જોવા મળી રહ્યા હતા.
