કથિત દારૂ કૌભાંડમાં ધરપકડ બાદ એક વર્ષથી વધુ સમય જેલમાં વિતાવનાર દિલ્હીના પૂર્વ નાયબ મુખ્યમંત્રી મનીષ સિસોદિયાએ ફરી એકવાર જામીન માટે કોર્ટમાં અરજી કરી છે. AAP નેતા મનીષ સિસોદિયાએ ચૂંટણી પ્રચાર માટે વચગાળાના જામીનની વિનંતી કરવા માટે દિલ્હીની કોર્ટનો સંપર્ક કર્યો છે.
CBI અને ED કેસ માટે વિશેષ ન્યાયાધીશ કાવેરી બાવેજા આ અરજી પર સુનાવણી કરી શકે છે. સીબીઆઈ અને ઈડી દ્વારા કથિત દિલ્હી એક્સાઈઝ પોલિસી કૌભાંડ કેસમાં સિસોદિયાની ધરપકડ કરવામાં આવી છે. કેન્દ્રીય તપાસ એજન્સીઓએ આરોપ લગાવ્યો છે કે દિલ્હી એક્સાઇઝ પોલિસીમાં સુધારો કરતી વખતે ગેરરીતિ આચરવામાં આવી હતી, લાઇસન્સ ધારકોને ખોટા લાભો આપવામાં આવ્યા હતા અને તેના બદલામાં લાંચ લેવામાં આવી હતી.
CBIએ 26 ફેબ્રુઆરી, 2023ના રોજ દિલ્હીના પૂર્વ નાયબ મુખ્યમંત્રી સિસોદિયાની ‘કૌભાંડ’માં કથિત ભૂમિકા બદલ ધરપકડ કરી હતી. EDએ 9 માર્ચ 2023ના રોજ સિસોદિયાની ધરપકડ કરી હતી. સિસોદિયાએ 28 ફેબ્રુઆરી 2023ના રોજ દિલ્હી કેબિનેટમાંથી રાજીનામું આપ્યું હતું. સિસોદિયા માર્ચ 2023થી તિહાર જેલમાં બંધ છે. તેણે નીચલી કોર્ટમાંથી સુપ્રીમ કોર્ટમાં જામીન માટે અપીલ કરી છે. પણ દરેક વખતે નિરાશા જ હાથ લાગી. તેણે પત્નીની બીમારીનું કારણ આપીને રાહત મેળવવાનો પ્રયાસ પણ કર્યો હતો. પરંતુ કોર્ટે જામીન અરજી ફગાવી દીધી હતી અને બેઠકની મંજૂરી આપી હતી.
દિલ્હીના મુખ્યપ્રધાન અરવિંદ કેજરીવાલની 21 માર્ચે દારૂ કૌભાંડ સંબંધિત આ જ કેસમાં ધરપકડ કરવામાં આવી છે. લોકસભા ચૂંટણીમાં તેમની ગેરહાજરીમાં આમ આદમી પાર્ટી નેતૃત્વ સંકટનો સામનો કરી રહી છે. જોકે, હાલમાં જ પાર્ટીના વરિષ્ઠ નેતા અને રાજ્યસભા સાંસદ સંજય સિંહને જામીન મળી ગયા છે. તે ચાર મહિના જેલમાં હતો.
