ખેડા – રાધા રમણ સ્વામી મુદ્દે વડતાલ મંદિરની પ્રતિક્રિયા

સ્વામી રાધારમણ પાસે ડુપ્લીકેટ નોટો મળી આવવાના મુદ્દે એક નવો વળાંક આવ્યો છે. રાધારમણ સ્વામી વડતાલના સ્વામિનારાયણ મંદિરના ચેરમેન દેવ સ્વામીના નજીકના હોવાની ચર્ચા થઈ રહી છે. જે મંદિરમાં નકલી નોટો છાપવાનું કામ થતું હતું. મંદિરનું ખાતમહુર્ત દેવ સ્વામીના હાથે થયું હોવાનો ફોટો વાયરલ થઈ રહ્યો છે. વડતાલ મંદિરના સ્વામીઓ સાથે રાધારમણ સ્વામીના સંબંધ હોવાની વાત કરી રહ્યા છે. આ મામલે સત્સંગ મહાસભાના પ્રમુખ નૌત્તમપ્રકાશદાસજી સ્વામીએ પ્રેસ કોન્ફરન્સ કરીને રાધારમણ સ્વામી સાથે મંદિરે છેડો ફાડી લીધાની જાણ કરી હતી. સ્વામીએ જણાવ્યું હતું કે, “અનેક લોકો વડતાલ મંદિરની ગુડવીલ લેવા માટે પોતાની સંસ્થાની બહાર બોર્ડ લગાવતા હોય છે. રાધારમણ સ્વામીએ આવું કામ કર્યું હતું. આ સમાચાર મીડિયામાં ચમક્યા બાદ અમારા ધ્યાનમાં આ વાત આવી હતી. રાધારમણ સ્વામી 2007 પછી વડતાલ ખાતે ક્યારેક જ આવ્યા છે. તેઓ એમના ગુરુથી ઘણા વર્ષોથી જુદા રહેતા હતા. અંબાવ સુખીની મુવાડી ખાતે તેમણે મંદિર અને આશ્રમ બનાવ્યો છે તેને વડતાલ મંદિર સાથે કોઈ પણ લેવાદેવા નથી.”