કેશોદના ઓઝત કાંઠે આડત્રીસ વર્ષ પહેલાં થયેલી પુર હોનારતની યાદથી હજું ગામવાસીઓ હિબકે ચડે છે…જુનાગઢ ના કેશોદના બામણાસા ગામે જળ હોનારતમાં એકસાથે ૫૯ લોકો મોતને ભેટયા હતાં ત્યારે દર વર્ષે ગામ સ્વયંભુ બંધ પાળી શોક વ્યક્ત કરે છે..સોરઠ પંથકમાં આજથી આડત્રીસ વર્ષ પહેલાં સાંબેલાધાર વરસાદ પડતાં ઓઝત નદી અને સાબળી નદીમાં ઘોડાપૂર આવ્યું હતું જેનાં કારણે ઓઝત નદી કાંઠે આવેલાં વિસ્તારમાં જાનમાલની મોટી ખુવારી થઈ હતી. કેશોદ તાલુકાનાં બામણાસા ગામે સમગ્ર સોરઠમાં સૌથી વધારે મોટી ખુવારી થઈ હતી. કેશોદ તાલુકાનાં બામણાસા ગામે પસાર થતી ઓઝત નદી અને સાબળી નદીનાં પાણી ફરી વળતાં એક જ ગામના ૫૯ લોકો મોતને ભેટયા હતાં. આજે પણ એ કરુણતા યાદ કરતાં ગામવાસીઓ હિબકે ચડી જાય છે.
બામણાસા ગામના વાડી વિસ્તારમાંથી લોકોને હોડી મારફતે લાવવામાં આવી રહ્યા હતાં ત્યારે અકસ્માતે હોડી ઉંધી વળી જતાં બેસેલા ઘોડાપુર માં તણાઈ ગયા હતા. બામણાસા ગામે પુર ઓસરતાં ઓઝત નદીના કિનારે તણાઈ ને આવેલ ઘરવખરી ઉપરાંત મૃતદેહ પરનાં દરદાગીના મુળ માલીકની ખરાઈ કરી આપવામાં આવ્યાં હતાં. કેશોદના બામણાસા ગામે આવેલ ભીડભંજન મહાદેવ મંદિર ની ગૌશાળામાં રહેતી ગાયો આશ્રમમાં પાણી ફરી વળતાં ભાભરવા લાગી હતી ત્યારે આવી કપરી પરિસ્થિતિમાં ખીલેથી છોડાવવા કોણ જાય પરંતુ કોઈ ગેબી શક્તિ દ્વારા તમામ ગાયોની સાંકળ છુટી જતાં ગાયો સલામત રહી હતી અને આશ્રમમાં આવેલ સિધ્ધ મહાપુરુષ મકનદાસ બાપુનો આવેલ ધુણો પાણી ફરી વળવા છતાં પણ પ્રજ્વલિત રહ્યો હતો એ શ્રધ્ધા અને આસ્થા નું પ્રમાણ બની ગયું હતું. બામણાસા ગામના વયોવૃદ્ધ, યુવાનો આડત્રીસ વર્ષ પહેલાં બનેલી હોનારતની ઘટનાને યાદ કરે છે તો હજુ આજે પણ એ દ્રશ્ય નજરે હોય એમ યાદ કરતાં કરતાં રોમેરોમમાં કરુણા વાણી સ્વરૂપે ટપેકે છે. સોરઠમાં ગત ૨૨મી ઓગસ્ટ ૧૯૮૩ માં થયેલી જળહોનારત માં એકસાથે ૫૯ લોકોએ જીવ ગુમાવ્યો હતો એ ગોઝારા દિવસે સમગ્ર ગામમાં સ્વયંભૂ બંધ પાળી શ્રધ્ધાંજલી આપવામાં આવે છે.
