ગુજરાત ATSએ સમયસર આતંકવાદી હુમલાના મોટા કાવતરાને નિષ્ફળ બનાવ્યો છે. ગુજરાત ATSએ સોમવારે અમદાવાદના સરદાર વલ્લભભાઈ પટેલ ઈન્ટરનેશનલ એરપોર્ટ પરથી ઈસ્લામિક સ્ટેટના ચાર આતંકીઓની ધરપકડ કરી હતી. ચારેય શ્રીલંકાના નાગરિકો અને ઈસ્લામિક સ્ટેટના આતંકવાદીઓ છે. ગુજરાત પોલીસ દ્વારા શેર કરવામાં આવેલી માહિતી અનુસાર, મજબૂત બાતમી બાદ એક ઓપરેશનમાં આ ચાર આતંકવાદીઓની ધરપકડ કરવામાં આવી હતી. ગુજરાત પોલીસ આ આતંકવાદીઓની કડક પૂછપરછ કરી રહી છે. ગુજરાત ડીજીપીના શબ્દોમાં ઓપરેશનની સંપૂર્ણ વાર્તા…
ગુજરાતના ડીજીપી વિકાસ સહાયે જણાવ્યું કે પોલીસને બાતમી મળી હતી કે મોહમ્મદ નુસરત, મોહમ્મદ નુફરન, મોહમ્મદ ફારીસ અને મોહમ્મદ રાઝદીન નામના 4 શ્રીલંકાના આતંકવાદીઓ હુમલા કરવાના ઈરાદા સાથે ભારત આવવાના છે. ચારેય પ્રતિબંધિત આતંકવાદી સંગઠન ઈસ્લામિક સ્ટેટના આતંકવાદી હોવાનું પણ ગુજરાત પોલીસને જાણવા મળ્યું હતું. ચારેય ISISની વિચારધારાથી પ્રભાવિત છે અને આતંકવાદી હુમલા કરવા માટે 18 કે 19 મેના રોજ રેલવે અથવા ફ્લાઈટ દ્વારા અમદાવાદ પહોંચવાના છે.
આ બાતમીના આધારે ગુજરાત ATSની ટીમો બનાવવામાં આવી હતી. તેમને પકડવા માટે વ્યૂહરચના બનાવવામાં આવી હતી. પોલીસે દક્ષિણના રાજ્યોમાંથી આવતી ટ્રેનો અને ફ્લાઈટ્સની પેસેન્જર લિસ્ટનું સંપૂર્ણ વિશ્લેષણ કર્યું હતું. ચારેય એક જ પીએનઆર નંબર પર ઈન્ડિગોની ફ્લાઈટમાં ચેન્નાઈથી અમદાવાદ આવી રહ્યા હોવાનું જાણવા મળ્યું હતું. આ વિશે કોલંબોનો સંપર્ક કરવામાં આવ્યો હતો અને ગુપ્ત માહિતીની પુષ્ટિ કરવામાં આવી હતી. પોલીસ અધિકારીએ કહ્યું કે ચારેય પાકિસ્તાની હેન્ડલરના સંપર્કમાં હતા અને હુમલો કરવા માટે ભારત આવ્યા હતા.
ડીજીપી વિકાસ સહાયે કહ્યું કે ફેબ્રુઆરી 2024થી ચારેય આતંકવાદીઓ અબુ નામના વ્યક્તિના સંપર્કમાં હતા. અબુ ISISનો આતંકવાદી છે અને પાકિસ્તાનમાં રહે છે. ચારેય સોશિયલ મીડિયા દ્વારા અબુના સંપર્કમાં હતા. આતંકવાદી અબુએ આ તમામને ભારતમાં આતંકવાદી હુમલા કરવા માટે પ્રોત્સાહિત કર્યા હતા. ચારેય એટલા કટ્ટરપંથી હતા કે તેઓ આત્મઘાતી બોમ્બ ધડાકા કરવા પણ તૈયાર હતા.
