ગુજરાતમાં કોરોના મહામારીની સ્થિતિને જોઈ જાહેર સ્વાસ્થ્યની જાળવણીના શુભ હેતુથી લાંબા સમય સુધી બંધ રહેલ ગાંઘીનગર સ્થિત અક્ષરધામના પ્રેરક પ્રદર્શનો આગામી 6 ફેબ્રુઆરી એટલે કે શનિવારથી દર્શનાર્થીઓ માટે શરુ થઈ રહ્યા છે. કોરોનાની સારવાર અને રસીકરણ અભિયાનના કારણે કોરોના મહામારીનું જોર ઘટતું જોવા મળી રહ્યુ છે.
ત્યારે ભગવાનના દર્શન અને સંદેશનું પાન કરવાથી ભાવિક ભક્તોના આત્મવિશ્વાસ અને મનોબળમાં વૃદ્ધિ થશે એવી શુભ ભાવનાથી જગવિખ્યાત અક્ષરધામ મંદિરના તમામ વિભાગો પૂર્વવત શરુ થઈ રહ્યા છે. મહત્વનું છે કે, મહામારીના વિકટ સંજોગોમાં બીએપીએસ સ્વામિનારાયણ સંસ્થા અને સ્વામિનારાયણ અક્ષરધામે અનેક સેવા પ્રવૃત્તિઓ દ્વારા સમાજના તમામ વર્ગોને રાહત પહોંચાડી હતી.
જાહેર સ્વાસ્થ્યની જાળવણી માટેના સરકારના આદેશો અને માર્ગદર્શિકાનું સચોટ પાલન કરવાની સાથે તારીખ 1 ડિસેમ્બરથી ભગવાનના દર્શન અને સચ્ચિદાનંદ વોટર શો સહિત અક્ષરધામ મંદિરના કેટલાક મર્યાદિત વિભાગો શરુ કરવામાં આવ્યા હતા. એ વખતે અક્ષરધામ મંદિરના આયોજકોએ યાત્રાળુઓના સ્વાસ્થ્યની જાળવણી માટે તકેદારીના તમામ પગલાઓ લઈને એક દાખલો બેસાડ્યો હતો.
ત્યારે છેલ્લા બે મહિનાના સફળ અનુભવ બાદ અક્ષરધામ મંદિરના આયોજકોએ લીધેલ નિર્ણય મુજબ શનિવાર 6 ફેબ્રુઆરીથી સ્વામિનારાયણ અક્ષરધામના તમામ વિભાગો સવારના 11:00 કલાકથી સાંજના 07:30 કલાક સુધી ખુલ્લા રહેશે. વર્ષોથી દેશ-વિદેશના દર્શનાર્થીઓ માટે ખાસ આકર્ષણનું કેન્દ્ર બની ગયેલ સચ્ચિદાનંદ વોટર શો દરરોજ સાંજે 6:45 કલાકે યોજાશે. આ ઉપરાંત તમામ પ્રદર્શન ખંડો, રોગપ્રતિકારક શક્તિવર્ધક ઔષધિઓ અને પ્રેરક પુસ્તકો મેળવવા માટેના બુક સ્ટોલ, બાળકો-યુવાનો માટે રાઇડ્સ, સાત્વિક અને સ્વાદિષ્ટ ભોજન ઉપલબ્ધ કરાવતુ પ્રેમવતી ઉપહાર ગૃહ પણ યાત્રિકોને આવકારવા સજ્જ થઈ ગયા છે. મહામારીના તણાવથી ત્રસ્ત અને હાશ માનવી માટે અક્ષરધામનો સંપૂર્ણ આધ્યાત્મિક અનુભવ જરુર સંજીવની સમો પૂરવાર થશે એવુ શ્રદ્ધાળુઓનું માનવું છે.
