ગુજરાતના આણંદ જિલ્લામાં મહિસાગર નદીમાં ડૂબી જવાથી એક જ પરિવારના ચાર લોકોના મોત થયા છે. મૃતકોમાં બે મહિલાઓનો પણ સમાવેશ થાય છે. શુક્રવારે આ અંગે માહિતી આપતા પોલીસે જણાવ્યું કે ઘટનાની માહિતી મળતા જ સ્થાનિક પોલીસ ગોતાખોરોની મદદથી ઘટનાસ્થળે પહોંચી, નદીમાંથી મૃતદેહોને બહાર કાઢ્યા અને પોસ્ટમોર્ટમ માટે મોકલી આપ્યા. તમને જણાવી દઈએ કે છેલ્લા 4 દિવસમાં મહિસાગર નદીમાં 6 લોકો ડૂબી ગયા છે.
આણંદ જિલ્લાની ખંભોળાજ પોલીસે એક નિવેદનમાં જણાવ્યું હતું કે આ ઘટના ગુરુવારે સાંજે ખાનપુર ગામની સીમમાં બની હતી. ખાનપુર ગામ ઉનાળામાં એક લોકપ્રિય પર્યટન સ્થળ છે, જ્યાં લોકો મહિસાગર નદીની મુલાકાત લેવા આવે છે.
નિવેદનમાં જણાવાયું છે કે ગામડી ગામના એક પરિવારના ચાર સભ્યો નદીમાં નાહવા માટે આવ્યા હતા. આ દરમિયાન તેમાંથી એક ડૂબવા લાગ્યો, પોતાને બચાવવા અન્ય ત્રણે પણ નદીમાં ઝંપલાવ્યું, પરંતુ તે બધા ઊંડા પાણીમાં ડૂબી ગયા. મૃતકોની ઓળખ સુરેશ વાઘેલા, પ્રકાશ વાઘેલા, વેસુબેન સોલંકી અને જ્યોતિ વાઘેલા તરીકે થઈ છે.
પોલીસે અકસ્માતે મોતનો ગુનો નોંધ્યો હતો
પોલીસે જણાવ્યું કે ઘટનાની માહિતી મળતાં જ ગામલોકો ઘટનાસ્થળે પહોંચી ગયા હતા, પરંતુ ત્યાં સુધીમાં ઘણું મોડું થઈ ગયું હતું અને તેઓ માત્ર પીડિતોના મૃતદેહ જ બહાર કાઢી શક્યા હતા. તેમણે કહ્યું કે ચારેય મૃતદેહોને પોસ્ટમોર્ટમ માટે જિલ્લા હોસ્પિટલમાં મોકલવામાં આવ્યા છે. આ બનાવ સંદર્ભે પોલીસે અકસ્માત મોતનો ગુનો નોંધ્યો હતો.
પોલીસે જણાવ્યું હતું કે અગાઉ 2 જૂને આણંદ શહેર અને લાંભવેલ ગામના બે લોકોના પણ નદીમાં ડૂબી જવાથી મોત થયા હતા.
