એન્ફોર્સમેન્ટ ડિરેક્ટોરેટે પશ્ચિમ બંગાળ શિક્ષક ભરતી કૌભાંડમાં રૂ. 365 કરોડની સંપત્તિ જપ્ત કરી છે. આ સિવાય અત્યાર સુધીમાં તૃણમૂલ કોંગ્રેસના ત્રણ ધારાસભ્યોની ધરપકડ કરવામાં આવી છે અને એકની ભૂમિકાની તપાસ કરવામાં આવી રહી છે. EDએ શુક્રવારે એક નિવેદન જારી કરીને કહ્યું કે અત્યાર સુધી આ કૌભાંડમાં 365.6 કરોડ રૂપિયા જપ્ત કરવામાં આવ્યા છે. આ ઉપરાંત વધુ તપાસ પણ ચાલી રહી છે. EDએ કહ્યું કે અમે આ કેસમાં 135 કરોડ રૂપિયા જપ્ત કરી ચૂક્યા છીએ. હવે 230 કરોડ રૂપિયાની મિલકત નવેસરથી એટેચ કરવામાં આવી છે. એજન્સીએ કહ્યું કે અત્યાર સુધી જે મિલકતો જપ્ત કરવામાં આવી છે તેમાં પ્રસન્ન કુમાર રોય અને શાંતિ પ્રસાદ સિંહાની જમીન અને ફ્લેટ સામેલ છે.
આરોપ છે કે પ્રસન્ન કુમાર રોયે આ કેસમાં મુખ્ય વચેટિયાની ભૂમિકા ભજવી હતી. તેણે જ શિક્ષકની ભરતી માટે હાજર રહેલા ઉમેદવારો પાસેથી પૈસા વસૂલ્યા હતા અને તેમની વિગતો મેળવી હતી. તે દરમિયાન શાંતિ પ્રસાદ સિંહા પશ્ચિમ બંગાળ શાળા સેવા આયોગના સલાહકાર હતા. આવી સ્થિતિમાં તેની ભૂમિકા પણ શંકાસ્પદ જણાઈ હતી અને તેની ધરપકડ પણ કરવામાં આવી હતી. આ કેસની તપાસ સીબીઆઈ દ્વારા શરૂ કરવામાં આવી હતી, જેનો મે 2022માં હાઈકોર્ટે આદેશ આપ્યો હતો. આ પછી જ્યારે મની લોન્ડરિંગનો એંગલ સામે આવ્યો તો ED પણ તપાસમાં લાગી ગઈ.
આ મામલામાં પૂર્વ શિક્ષણ મંત્રી પાર્થ ચેટર્જી સહિત ટીએમસીના ત્રણ ધારાસભ્યોની ધરપકડ કરવામાં આવી છે. હાલ આ લોકો જ્યુડિશિયલ કસ્ટડીમાં છે. આ સિવાય રોય અને સિંહા પણ કસ્ટડીમાં છે. TMC સાંસદ અભિષેક બેનર્જીની પણ CBI અને ED બંને દ્વારા આ મામલે પૂછપરછ કરવામાં આવી છે. અભિષેકને બોલાવવાનું એટલા માટે પણ મહત્વનું છે કારણ કે તે સીએમ મમતા બેનર્જીના ભત્રીજા છે. આવી સ્થિતિમાં તેમની સામે સમન્સ જારી થતાં રાજકીય ગરમાવો પણ સર્જાયો હતો. એટલું જ નહીં, EDએ અભિષેક બેનર્જીના પિતા અમિત બેનર્જી અને માતા લતા બેનર્જીને પણ સમન્સ જારી કર્યા હતા. પરંતુ બંનેએ સ્વાસ્થ્યનું કારણ દર્શાવીને હાજર થવાનો ઇનકાર કર્યો હતો.
અભિષેક બેનર્જી બંગાળના સીએમ મમતા બેનર્જીના સૌથી નાના ભાઈ અમિત બેનર્જીનો પુત્ર છે. તેમને TMCમાં મમતા બેનર્જી પછી બીજા નેતા તરીકે જોવામાં આવે છે. અભિષેક ઉપરાંત તેની પત્ની રૂજીરા બેનર્જી પણ એજન્સી સમક્ષ હાજર થઈ છે. ઉલ્લેખનીય છે કે આ વર્ષે માર્ચમાં EDએ બંગાળના ટેક્સટાઈલ મંત્રી ચંદ્રનાથ સિંહાની પણ પૂછપરછ કરી હતી.
