મુંબઈમાં 26 નવેમ્બરે થયેલા આતંકી હુમલાને 11 વર્ષ પૂરા થયા છે. પરંતુ આજ સુધી તેના માસ્ટર માઈન્ડ હાફિઝ સઈદને સજા નથી મળી. દેશમાં દર વર્ષે 26 નવેમ્બરે શહીદોને શ્રદ્ધાંજલિ આપવા માટે કાર્યક્રમનું આયોજન કરવામાં આવે છે. આ વર્ષે પણ મુંબઈના ગેટ વે ઓફ ઈન્ડિયા પર કાર્યક્રમનું આયોજન કરવામાં આવ્યું હતું. કાર્યક્રમમાં બોલિવુડના મહાનાયક અમિતાભ બચ્ચન ઉપરાંત રક્ષા મંત્રી રાજનાથ સિંહ અને પરિવહન મંત્રી નિતિન ગડકરી હાજર રહ્યા હતા. આ કાર્યક્રમમાં અમિતાભ બચ્ચને સ્ટેજ પર વિશેષ પર્ફોર્મન્સ આપ્યું હતું. સાથે શહીદોને વિશિષ્ટ અંદાજમાં નમન કર્યું હતું.
આતંકી હુમલાના શહીદોને શ્રદ્ધાંજલિ આપવા યોજાયેલા કાર્યક્રમમાં અમિતાભ બચ્ચન કાળા રંગના કુર્તા-પાયજામામાં જોવા મળ્યા હતા.કાર્યક્રમમાં અમિતાભ બચ્ચનની સાથે દીકરા અભિષેક અને પુત્રવધૂ ઐશ્વર્યાએ હાજરી આપી હતી. ઉપરાંત દીકરી શ્વેતા બચ્ચન નંદા હાજર રહી હતી. અમિતાભ બચ્ચન પર્ફોર્મન્સ આપી રહ્યા હતા ત્યારે બચ્ચન પરિવારના ત્રણેય સભ્યો ઓડિયન્સમાં બેસીને તેમને નિહાળી રહ્યા હતા. ઉલ્લેખનીય છે કે, 26 નવેમ્બર 2008ના રોજ મુંબઈમાં થયેલા આતંકી હુમલામાં ઓછામાં ઓછા 166 લોકોના મોત થયા હતા. હુમલામાં 10 આતંકીઓમાં જીવિત પકડાયેલા એકમાત્ર આતંકવાદી અજમલ કસાબને નવેમ્બર 2012માં મોતની સજા સંભળાવાઈ હતી.
