પાલનપુર સામઢી હનુમાનપુરા ખાતે વૃક્ષોને રાખડી બાંધી વૃક્ષોના જતનનો સંદેશ આપવામાં આવ્યો હતો. પાલનપુરની કસ્તુરબા બાલ વિદ્યાલયના જન્મદિવસ નિમિત્તે આ અનોખુ આયોજન કરવામાં આવ્યુ હતું. જેમાં ગુજરાતના ખ્યાતનામ કલાકારો અને જીલ્લાશિક્ષણ સમિતિના ચેરમેનની ઉપસ્થિતીમાં વૃક્ષોને રાખડી બાંધી વૃક્ષોના જતનનો સંદેશ આપ્યો હતો. મળતી માહિતી મુજબ, પાલનપુર તાલુકાના સામઢી ખાતે હનુમાનપુરામાં આવેલી કસ્તુરબા બાલ વિધાલયને છ વર્ષ પુર્ણ થતાં શાળાના જન્મદિવસની ઊજવણી કરવામાં આવી હતી. જેમાં ગુજરાતના સુપ્રસિધ્ધ રાકેશ બારોટ, પંચમ ઈન્ટરનેશનલ ગ્રુપના દર્શનાબેન વ્યાસ, જીલ્લા શિક્ષણસમિતી ચેરમેન લક્ષ્મીબેન કરેણ તેમજ સાગર પુરબીયાની હાજરીમાં કેક કાપી શાળાના જન્મદિવસની ઊજવણી કરવામાં આવી હતી. સદવિચાર ફાઉન્ડેશનના સયુંકત ઉપક્રમે કાર્યક્રમ રાખવામાં આવ્યો હતો અને સદવિચાર ફાઉન્ડેશન દ્રારા શાળાને પુસ્તકો ભેટ આપી લાયબ્રેરીનુ ઉદ્ઘાટન કરવામાં આવ્યુ હતુ. શાળામાં આવેલા વૃક્ષોના જતન માટે વૃક્ષોને રાખડી બાંધી વૃક્ષોના જતન માટેનો સંદેશો પાઠવ્યો હતો.
