કોંગ્રેસ સાંસદ રાહુલ ગાંધીએ તેમના ગુજરાત પ્રવાસ દરમિયાન કહ્યું હતું કે અમે અયોધ્યામાં ભાજપને જે રીતે હરાવ્યું તે રીતે અમે અહીં પણ ભાજપને હરાવીશું. અમદાવાદમાં ભાજપ પર પ્રહાર કરતા રાહુલ ગાંધીએ કહ્યું કે મેં સંસદમાં અયોધ્યાના સાંસદને પૂછ્યું કે ભાજપ અયોધ્યામાં કેમ હારી? તેમણે કહ્યું કે અયોધ્યાના લોકો પાસેથી જમીનો છીનવી લેવામાં આવી છે, લોકોની દુકાનો અને મકાનો તોડી પાડવામાં આવ્યા છે અને તેમને વળતર આપવામાં આવ્યું નથી. ઇન્ટરનેશનલ એરપોર્ટના નામે ખેડૂતોની જમીન લેવામાં આવી, વળતર આજદિન સુધી આપવામાં આવ્યું નથી. આ સિવાય રામ મંદિરના ઉદ્ઘાટનમાં અયોધ્યાના લોકોને આમંત્રણ આપવામાં આવ્યું ન હતું. આથી અયોધ્યાના લોકો નારાજ થયા અને તેમણે ભાજપને હરાવ્યો.
સંસદમાં વિપક્ષના નેતા રાહુલ ગાંધીએ કહ્યું કે હું તમને કહેવા આવ્યો છું. તેઓએ (ભાજપ) અમારી ઓફિસ પર હુમલો કર્યો છે, અમારે ડરવાની જરૂર નથી. તેમણે અમને એક પડકાર આપ્યો છે. પડકાર એ છે કે આપણે સાથે મળીને ગુજરાતમાં ભાજપને હરાવવાનું છે. હવે કોંગ્રેસ ગુજરાતમાં નરેન્દ્ર મોદી અને ભાજપને હરાવશે. રાહુલ ગાંધીએ દાવો કર્યો કે અયોધ્યા સાંસદે કહ્યું કે નરેન્દ્ર મોદી વારાણસીથી નહીં પણ અયોધ્યાથી ચૂંટણી લડવા માગે છે. અયોધ્યામાં 3 વખત સર્વે કરવામાં આવ્યો, પરંતુ સર્વેમાં લોકોએ કહ્યું કે જો નરેન્દ્ર મોદી અયોધ્યાથી ચૂંટણી લડશે તો તેઓ હારી જશે અને તેમની રાજકીય કારકિર્દી ખતમ થઈ જશે. એટલા માટે નરેન્દ્ર મોદી વારાણસીથી લડ્યા હતા, પરંતુ ત્યાંથી પણ તેઓ જીવ લઈને ભાગી ગયા હતા.
