મધ્યપ્રદેશના દમોહમાં જમીન વિવાદમાં ત્રણ લોકોના મોત થયા છે. સોમવારે સવારે બનેલી આ ઘટનામાં 50 વર્ષીય વ્યક્તિ, તેના પુત્ર અને ભત્રીજાનું મોત થયું હતું. આ ઘટનાને અંજામ આપનાર બે આરોપીઓની ઓળખ થઈ ગઈ છે. એસપી શ્રુત કીર્તિ સોમવંશીએ જણાવ્યું કે આરોપીને પકડવાના પ્રયાસો ચાલુ છે.
આ ઘટના દમોહ દેહત પોલીસ સ્ટેશન હેઠળના બંસ્તરખેડા ગામમાં બની હતી. અધિકારીએ જણાવ્યું કે, બે લોકોને ગોળી મારી દેવામાં આવી છે. જ્યારે ત્રીજાની તિક્ષ્ણ હથિયાર વડે કાપીને હત્યા કરવામાં આવી હતી. પ્રાથમિક માહિતી મુજબ આ ઘટના જમીનના વિવાદને કારણે બની હતી.
મૃતકોની ઓળખ હોમગાર્ડ જવાન રમેશ વિશ્વકર્મા, તેમના પુત્ર ઉમેશ વિશ્વકર્મા (23) અને ભત્રીજા રવિ વિશ્વકર્મા (24) તરીકે થઈ છે. કહેવામાં આવી રહ્યું છે કે આરોપીઓએ હોમગાર્ડ જવાન રમેશ વિશ્વકર્માને સમજૂતીની વાત કરવા માટે પોતાના ઘરે બોલાવ્યા હતા. પરંતુ ત્યાં તિક્ષ્ણ હથિયાર વડે તેની હત્યા કરી દેવામાં આવી હતી.
થોડા સમય બાદ ઉમેશ અને રવિની પણ હત્યા કરવામાં આવી હતી. બંને બાઇક પર દમોહ જઈ રહ્યા હતા ત્યારે રસ્તાની વચ્ચે ગોળી વાગી હતી. ઇજાગ્રસ્ત ઉમેશ અને રવિનું રસ્તા વચ્ચે જ મોત નીપજ્યું હતું. ઘટના બાદ સમગ્ર વિસ્તારમાં સનસનાટી ફેલાઈ ગઈ હતી. આરોપી સ્થળ પરથી નાસી ગયો હતો.
કહેવામાં આવી રહ્યું છે કે બંને પરિવારો વચ્ચે જમીનને લઈને ઘણા સમયથી વિવાદ ચાલી રહ્યો હતો. ગયા મહિને પણ બંને પરિવારો વચ્ચે ઝઘડાની વાત થઈ હતી. હાલ ગામમાં ભારે પોલીસ બંદોબસ્ત ગોઠવી દેવામાં આવ્યો છે. વહેલી સવારે આવી ઘટનાઓથી સમગ્ર વિસ્તાર સ્તબ્ધ છે. લોકો આરોપીઓની તાત્કાલિક ધરપકડ કરી કડક સજાની માંગ કરી રહ્યા છે.
