કેન્દ્રીય મંત્રી જ્યોતિરાદિત્ય સિંધિયાએ મંગળવારે સંચાર મંત્રાલયનો હવાલો સંભાળ્યો. તેમણે ચાર્જ સંભાળતાની સાથે જ વિભાગીય અધિકારીઓને જણાવ્યું હતું કે આગામી વર્ષોમાં વૈશ્વિક અને સ્થાનિક સ્તરે ટેલિકોમ ક્ષેત્ર અને ભારતીય ટપાલ વિભાગ બંનેની મહત્વપૂર્ણ ભૂમિકા છે. 53 વર્ષીય સિંધિયાએ કહ્યું કે વડાપ્રધાન મોદીના નેતૃત્વમાં ક્રાંતિ આવી છે અને તેમણે વડાપ્રધાન અને દેશના લોકોની આકાંક્ષાઓ અનુસાર શ્રેષ્ઠ કામ કરવાનો સંકલ્પ કર્યો છે.
કાર્યભાર સંભાળ્યા પછી સિંધિયાએ પત્રકારોને કહ્યું, “આ ખરેખર મારા માટે સન્માનની વાત છે કે વડા પ્રધાન નરેન્દ્ર મોદીએ મને સંચાર મંત્રાલયની જવાબદારી સોંપી છે. ભારતીય ટપાલ વિભાગ, ટેલિકોમ વિભાગની સાથે વૈશ્વિક અને સ્થાનિક સ્તરે પણ મહત્વપૂર્ણ ભૂમિકા ભજવે છે, જેથી કરીને દેશ અને સમગ્ર વિશ્વમાં કરોડો લોકોના હૃદયમાં સ્થાન બનાવી શકાય.”
તમને જણાવી દઈએ કે સિંધિયા લગભગ દોઢ દાયકા પહેલા સંચાર રાજ્ય મંત્રી રહી ચૂક્યા છે. સિંધિયાએ કહ્યું, “તે મારા માટે એક વર્તુળ પૂર્ણ કરવા જેવું છે. મેં ઘણા વર્ષો પહેલા 2007, 2008 અને 2009માં આ વિભાગમાં જુનિયર મંત્રી તરીકે કામ કર્યું હતું. તેથી મારા માટે આ એક એવો વિભાગ છે જેની સાથે મારું ભાવનાત્મક જોડાણ છે.”
નવા ટેલિકોમ પ્રધાન તરીકે, સિંધિયાને આ મહિનાના અંતમાં યોજાનારી 5G સ્પેક્ટ્રમની હરાજી પૂર્ણ કરવાની કામગીરીનો સામનો કરવો પડી રહ્યો છે. સ્પેક્ટ્રમની હરાજી ઉપરાંત, સિંધિયાએ સેટેલાઇટ બ્રોડબેન્ડ સેવાઓ, ઉદ્યોગપતિ એલોન મસ્કની આગેવાની હેઠળની સ્ટાર્ટલિંક માટે સુરક્ષા મંજૂરી અને નવા ટેલિકોમ એક્ટ માટે નિયમો ઘડવા જેવા મુદ્દાઓને પણ પ્રાથમિકતા આપવી પડશે. સિંધિયાએ 100-દિવસના એજન્ડા પર કામ શરૂ કરવું પડશે જે સ્પષ્ટ પ્રાધાન્યતા ક્ષેત્રો, મુખ્ય સિદ્ધિઓ, માર્ગદર્શન અને ટેલિકોમ ક્ષેત્ર માટે લક્ષ્યોની રૂપરેખા આપશે.
#WATCH | Delhi: Jyotiraditya Scindia takes charge as Minister of Communications pic.twitter.com/jb3GwIh4uh
— ANI (@ANI) June 11, 2024
સિંધિયા મનમોહન સિંહની આગેવાની હેઠળની સંયુક્ત પ્રગતિશીલ ગઠબંધન (યુપીએ)-1 સરકારમાં પ્રથમ વખત મંત્રી બન્યા હતા. તે સમયે તેઓ ટેલિકોમ્યુનિકેશન, પોસ્ટ અને આઈટી રાજ્ય મંત્રી હતા. ત્યારબાદ પ્રોજેક્ટ એરો સ્કીમ સાથે પોસ્ટ ઓફિસના આધુનિકીકરણમાં મહત્વની ભૂમિકા ભજવી હતી. હવે, દોઢ દાયકા પછી, સિંધિયા પ્રમોશન મેળવીને અને તે જ મંત્રાલયના કેબિનેટ મંત્રી તરીકે સંપૂર્ણ 360 ડિગ્રી વળાંક લઈને પાછા ફર્યા છે. અગાઉ, તેઓ 2021 થી મોદી સરકાર-2.0 માં નાગરિક ઉડ્ડયન મંત્રાલયની સંભાળ રાખતા હતા. (ભાષા ઇનપુટ્સ સાથે)
