મુંબઈમાં સોમવારે થયેલી હોર્ડિંગ દુર્ઘટનામાં કુલ 16 લોકોના મોત થયા છે. આખરે તેમની કારમાંથી એક પુરુષ અને એક મહિલાના મૃતદેહ મળી આવ્યા છે. વૃદ્ધ દંપતી પેટ્રોલ ભરવા આવ્યા હતા, પરંતુ અકસ્માત સર્જાયો હતો. ખાસ વાત એ છે કે 250 ટન વજનના હોર્ડિંગની નીચે લગભગ 100 લોકો દટાયા હતા. એનડીઆરએફ દ્વારા પણ હવે બચાવ કાર્ય બંધ કરી દેવામાં આવ્યું હોવાના અહેવાલ છે.
બુધવારે રાત્રે, 60 વર્ષીય મનોજ ચાન્સોરિયા અને 59 વર્ષીય અનિતાના મોત થયા હતા. ચાન્સોરિયા માર્ચમાં જ મુંબઈ એટીસીમાંથી જનરલ મેનેજરના પદ પરથી નિવૃત્ત થયા હતા અને બંને જબલપુર શિફ્ટ થઈ ગયા હતા. મીડિયા રિપોર્ટ્સ અનુસાર, પોલીસનું કહેવું છે કે તે બંને અનિતા ચાન્સોરિયાના વિઝા સંબંધિત કામના કારણે થોડા દિવસો માટે મુંબઈ આવ્યા હતા.
ખાસ વાત એ છે કે કામ પૂરું કરીને બંને જબલપુલ પરત ફરી રહ્યા હતા અને રસ્તામાં ઘાટકોપર પંપ પર પેટ્રોલ ભરવા માટે રોકાયા હતા. પછી જોરદાર વાવાઝોડું આવ્યું અને અકસ્માત થયો. હાલ અમેરિકામાં રહેતા તેમના પુત્રએ વાત કરવાનો પ્રયાસ કર્યો, પરંતુ સંપર્ક ન થવાને કારણે તેણે મિત્રની મદદ લીધી. તેના મિત્રએ ગુમ થયાની ફરિયાદ નોંધાવી હતી.
જ્યારે પોલીસે તેમના બંને મોબાઈલનું લોકેશન ટ્રેસ કર્યું ત્યારે અંતિમ લોકેશન ઘાટકોપરના પેટ્રોલ પંપ પાસે મળી આવ્યું હતું. આ ઘટનામાં કુલ 16 લોકોના મોત થયા છે અને 41 લોકો ગંભીર રીતે ઘાયલ છે. 34 લોકો સારવાર બાદ પોતાના ઘરે પરત ફર્યા છે. અહીં પોલીસ માલિકને પણ શોધી રહી છે. તેની સામે FIR નોંધવામાં આવી છે.
NDRFએ કામ બંધ કરી દીધું
પીટીઆઈના જણાવ્યા અનુસાર, બૃહન્મુંબઈ મ્યુનિસિપલ કોર્પોરેશન (BMC) એ હવે મુંબઈના ઘાટકોપર વિસ્તારમાં જ્યાં એક વિશાળ હોર્ડિંગ પડી ગયું હતું તે સ્થળે શોધ અને બચાવ કામગીરી બંધ કરવાની જાહેરાત કરી છે. નેશનલ ડિઝાસ્ટર રિસ્પોન્સ ફોર્સ (NDRF)ના એક અધિકારીએ ગુરુવારે આ જાણકારી આપી.
અધિકારીએ જણાવ્યું કે સોમવારે સાંજે કમોસમી વરસાદ અને જોરદાર વાવાઝોડા દરમિયાન છેડાનગર વિસ્તારમાં પેટ્રોલ પંપ પર લાગેલું વિશાળ હોર્ડિંગ પડી ગયું હતું, ત્યારબાદ તેની નીચે દટાયેલા લોકોને બચાવવા માટે 66 કલાક સુધી શોધ અને બચાવ કામગીરી હાથ ધરવામાં આવી હતી. એનડીઆરએફના એક અધિકારીએ જણાવ્યું હતું કે ગુરુવારે સવારે 10.30 વાગ્યે ઓપરેશન બંધ કરવામાં આવ્યું હતું.
