દારુ કૌભાંડમાં ફસાયેલા દિલ્હીના મુખ્યમંત્રી અરવિંદ કેજરીવાલની મુસીબતો ઓછી થવાના સંકેત દેખાઈ રહ્યા નથી. ED દ્વારા કેજરીવાલની ધરપકડ કર્યા પછી, હવે એક જાહેર હિતની અરજી (PIL) દાખલ કરવામાં આવી છે, જેમાં કેજરીવાલને દિલ્હીના સીએમ પદ પરથી હટાવવાની માંગ કરવામાં આવી છે. આ અરજી દિલ્હીના રહેવાસી સુરજીત સિંહ યાદવે દિલ્હી હાઈકોર્ટમાં દાખલ કરી છે. ખબર છે કે કેજરીવાલની ધરપકડ બાદ દિલ્હીના મંત્રી આતિશીએ સ્પષ્ટ કર્યું હતું કે તેઓ રાજીનામું નહીં આપે અને જેલમાંથી જ સરકાર ચલાવશે.
દિલ્હી હાઈકોર્ટમાં દાખલ કરવામાં આવેલી અરજીમાં અરજદારે કહ્યું છે કે મુખ્યમંત્રી પર નાણાકીય કૌભાંડનો આરોપ હોવાથી તેમને જાહેર પદ પર રહેવાની મંજૂરી આપવી જોઈએ નહીં. પીઆઈએલ દાખલ કરનાર સુરજીત યાદવે દાવો કર્યો છે કે તે એક ખેડૂત અને સામાજિક કાર્યકર છે. લાઈવ લો અનુસાર, પીઆઈએલમાં સુરજીતે એમ પણ કહ્યું હતું કે કેજરીવાલના પદ પર ચાલુ રહેવાથી કાયદાની પ્રક્રિયામાં અવરોધ આવશે. જેના કારણે રાજ્યમાં બંધારણીય વ્યવસ્થામાં ભંગાણ પડવાની આશંકા છે.
