ગુજરાત પોલીસે સોશિયલ મીડિયા પર વાયરલ થઈ રહેલા એક વીડિયોની નોંધ લીધી છે. કાર્યવાહી કરીને, પોલીસે સાત ટ્રાફિક બ્રિગેડ (TRB) કર્મચારીઓની સેવાઓ સમાપ્ત કરી અને ત્રણ પોલીસકર્મીઓને સસ્પેન્ડ કર્યા. દિલ્હીના એક વેપારીએ દાવો કર્યો હતો કે પોલીસે તેની કારમાં દારૂની બોટલ લઈ જવા માટે તેની પાસેથી કથિત રીતે 20,000 રૂપિયાની લાંચ લીધી હતી. ડેપ્યુટી કમિશનર ઓફ પોલીસ (ટ્રાફિક-ઈસ્ટ) સફીન હસને મંગળવારે જણાવ્યું હતું કે આ કાર્યવાહી બિઝનેસમેન કનવ મનચંદા દ્વારા પોસ્ટ કરવામાં આવેલા એક વીડિયોને પગલે કરવામાં આવી છે જેમાં તેણે રવિવારે અમદાવાદની મુલાકાત દરમિયાન કેટલાક પોલીસ કર્મચારીઓ પર 20,000 રૂપિયાની લાંચ લેવાનો આરોપ લગાવ્યો હતો.
હસને કહ્યું કે, રવિવારે આઈસીસી વર્લ્ડ કપની ફાઈનલ મેચ જોવા માટે દિલ્હીથી અમદાવાદ તેની કારમાં આવેલા મનચંદાએ કોઈ ઔપચારિક ફરિયાદ નોંધાવી ન હતી, પરંતુ પોલીસે તેના વાયરલ વીડિયોની નોંધ લીધી હતી. જેમાં કથિત રીતે સામેલ 10 પોલીસકર્મીઓ સામે કાર્યવાહી કરવામાં આવી હતી.
ડીસીપીએ કહ્યું, ‘અમે કથિત ઘટનાની વિગતવાર તપાસના આદેશ આપી દીધા છે, અમારી પ્રાથમિક તપાસમાં આ ઘટના બની હોવાનું જાણવા મળ્યું છે. અમે અમારા ત્રણ પોલીસકર્મીઓને સસ્પેન્ડ કર્યા છે અને તેમની કથિત ભૂમિકા બદલ સાત TRB જવાનોની સેવાઓ સમાપ્ત કરી છે. સસ્પેન્ડ કરાયેલા પોલીસકર્મીઓમાં એક હેડ કોન્સ્ટેબલ અને બે કોન્સ્ટેબલનો સમાવેશ થાય છે. વીડિયોમાં મનચંદા કહે છે કે જ્યારે તેઓ રવિવારે સવારે પોતાની કારમાં નરેન્દ્ર મોદી સ્ટેડિયમ જઈ રહ્યા હતા ત્યારે શહેરના બહારના નાના ચિલોડા સર્કલ પર કેટલાક પોલીસકર્મીઓએ તેમને રોક્યા હતા.
મનચંદાએ કહ્યું કે તે પોતાની કારમાં દારૂની બોટલ લઈને જતો હોવાથી પોલીસે તેની સામે કોઈ કાર્યવાહી નહીં થાય તેવું વચન આપીને તેની પાસેથી કથિત રીતે લાંચ માંગી હતી. અંતે, પોલીસકર્મીઓએ રૂ. 20,000 પર સમાધાન કર્યું. મનચંદાએ દાવો કર્યો હતો કે તેણે આ ચુકવણી UPI દ્વારા કરી હતી. તમને જણાવી દઈએ કે ગુજરાત ડ્રાય સ્ટેટ છે, જ્યાં દારૂ પર સંપૂર્ણ પ્રતિબંધ છે.
પોતાના દાવાના સમર્થનમાં, મનચંદાએ તેના મોબાઈલ ફોનનો સ્ક્રીનશોટ શેર કર્યો, જેમાં જાણવા મળ્યું કે તેણે પોલીસની સૂચના મુજબ અરુણ હડિયોલ નામના વ્યક્તિને 20,000 રૂપિયા ચૂકવ્યા હતા. હસને કહ્યું, ‘પીડિતાએ કોઈ ફરિયાદ નોંધાવી ન હોવાથી, અમે તેનું વિગતવાર નિવેદન લેવા માટે અમારી ટીમને દિલ્હી મોકલી છે અને જો તે ઈચ્છે તો ઔપચારિક ફરિયાદ પણ લઈ શકે છે. UPI દ્વારા પૈસા મેળવનાર વ્યક્તિને પણ તપાસ માટે બોલાવવામાં આવશે.
