બોલિવુડની ઘણી હસ્તીઓએ મંગળવારે દુર્ગા પૂજા અને દશેરાની ઉજવણીની પોતાની તસવીરો સોશયલ મીડિયા પર શેર કરી પોતાના પ્રશંસકોને શુભેચ્છા આપી. જોકે, તેમાં ઋષિ કપુરનો અંદાજ કંઈક અલગ જ હતો અને અલગ અંદાજના ચક્કરમાં તેઓ ટ્રોલ થઈ ગયા.શસ્ત્ર પૂજા તરીકે તેમણે બોટલ ઓપનરની પૂજા કરી અને તેની તસવીર સોશયલ મીડિયા પર પણ શેર કરી. દશેરાએ લોકો પોતાના શસ્ત્રોની પૂજા કરતા હોય છે. ત્યારે ઋષિ કપુરે બોટલ ઓપનરની કરેલી પૂજાથી લોકો ગુસ્સે ભરાયા અને તેમને ખૂબ ટ્રોલ કર્યા.
ઋષિ કપુરે સિંદુર અને ચંદન તિલક સાથે એક બોટલ ઓપનરની તસવીર ટ્વિટ કરી અને લખ્યું કે,હેપ્પી દશેરા! તહેવારોની સીઝન શરૂ થાય છે. હથિયારોનો ઉપયોગ જવાબદારી પૂર્વક કરો. ઋષિની આ પોસ્ટ લોકોને પસંદ ન આવી અને તેમને ટ્રોલ કરવાનું શરૂ કરી દીધું. ઉલ્લેખનીય છે કે, ઋષિ કપુર તાજેતરમાં જ પત્ની નીતુ સાથે ઈટાલી રજાઓ માણવા ગયા હતા અને ત્યાંની કેટલીક તસવીરો શેર કરી હતી. ઋષિ અમેરિકામાં 11 મહિના રહીને હાલમાં જ ભારત પાછા આવ્યા છે. તે અમેરિકા કેન્સરની સારવાર માટે ગયા હતા.
