સુરત શહેરમાં સતત બીજા દિવસે ભારે પવન ફૂંકાવાની સાથે સાથે આકાશમાં વાદળ છવાયા વાતાવરણ વચ્ચે અમી છાંટા પડયાછે. સુરતમાં છેલ્લા ત્રણેક દિવસથી ભારે પવનો ફૂંકાઇ રહ્યા છે. આજે પણ પવન ફૂંકાઈ રહ્યો છે. સાથે જ વાતાવરણમાં પલટોઆવતા આજે આકાશમાં કાળા ડિબાંગ વાદળો પણ છવાયા છે. આવતીકાલે 25 મે બાદ સુરત સહિત દક્ષિણ ગુજરાતમાં પ્રિ-મોન્સૂન એક્ટીવીટી શરૂ થવાની આગાહી વ્યક્ત કરવામાં આવી છે. મોડી રાતે શહેરના અલથાણ, વેસુ, વીઆઇપી રોડ વિસ્તારમાં છૂટાછવાયા ઝાપટાં પડ્યાં હતાં.
વહેલી સવારે કાળાડિંબાગ વાદળો છવાતાં વરસાદ પડે તેવો માહોલ સર્જાયો છે. શહેરમાં ભારે પવનો ફૂંકાવાના કારણે બે દિવસમાં 10થી વધુ ઝાડ પડી ગયા છે. કતારગામ નંદુદોશીની વાડી, નવી સિવિલ હોસ્પિટલ સુપ્રિટેન્ડન્ટ ઓફિસ પાસે અને ઘોડદોડ રોડ જોગર્સ પાર્ક પાસે ઝાડ પડવાના કોલ મળ્યા હતા. રાત્રિના સમયે કતારગામ,સરથાણા, વરાછા, અલથાણ, અડાજણ, ચોક, રાંદેર સહિતના વિસ્તારોમાં વરસાદી છાંટા અને ઝાપટાં પડ્યાં હતાં.
