ફિલ્મોની સાથે સાથે હવે વેબ સિરીઝ પણ દર્શકોને પોતાની તરફ આકર્ષી રહી છે. હિન્દીની સાથે સાથે ગુજરાતી વેબ સીરીઝનું પણ ચલણ વધ્યુ છે. ત્યારે જાણીતા ગુજરાતી કલાકાર કે જેઓ પોતાની કોમેડીથી સૌ કોઈને મનોરંજન પુરુ પાડી રહ્યા છે તેવા જીતુ પંડ્યા એક વેબ સીરીઝ લઈને આવી રહ્યા છે.
જી હાં દિપકભાઈ દરજીના પ્રોડક્શન હેઠળ બની રહેલ લાલુ સૌને વ્હાલો નામની આ વેબ સીરીઝની શૂટિંગની કેટલીક તસવીરો હાલ સોશિયલ મીડિયામાં વાયરલ થઈ રહી છે. જે ખૂદ અભિનેતા જીતુ પંડ્યાએ પોતાના સોશિયલ મીડિયા એકાઉન્ટ પર શેર કરી હતી. જેમાં તેઓ ખૂબ જ અલગ જ અંદાજમાં જોવા મળી રહ્યા છે.
આ વેબ સીરીઝનું ડાયરેક્શન હિતેશ રાવલ કરી રહ્યા છે. જ્યારે તેને વસંતભાઈ અકેડીવાલા પ્રોડ્યુસ કરી રહ્યા છે. આ વેબ સીરીઝમાં જીતુ પંડ્યાની સાથે પ્રતિમા, દિપા ત્રિવેદી, નિરવ દરજી, પરેશ લિંબાચીયા પણ નજરે પડશે. જોકે આ વેબ સીરીઝ ક્યારે રીલીઝ થશે તે અંગે હજી સુધી કોઈ માહિતી સામે આવી નથી.
હાલ તેનું બનાસકાંઠા જિલ્લાના પાલનપુર ખાતે શૂટિંગ ચાલી રહ્યુ છે. આ વેબ સીરીઝમાં જીતુ પંડ્યાના રોલને જોઈ પ્રશંસકો પણ ખૂબ જ આતુરતાથી તેની રાહ જોઈ રહ્યા છે.
