પાકિસ્તાનની પ્રથમ મહિલા બુશરા બેગમ ઈમરાન ખાન સાથે લગ્ન બાદ સમગ્ર દુનિયા માટે એક કોયડો બની છે. હવે નિકાહના લાંબા સમય બાદ પાકિસ્તાનના વડાપ્રધાન ઈમરાન ખાને પોતાની રહસ્યમય પત્ની સાથે પોતાના સંબંધોને લઈને અનેક ખુલાસા કર્યા છે. ઇમરાન ખાનની પત્ની બુશરા બેગમ તેની સુંદરતાને લઈને પહેલાથી જ ચર્ચામાં રહી હતી. ત્યારે હવે ઈમરાન ખાને પત્નીને લઈ કેટલાક ખુલાસા કર્યા છે.
ઈમરાન ખાને કહ્યું કે, તેમની પત્ની ખુબ જ બુદ્ધીશાળી છે. તે સરકાર સાથે સંકળાયેલા દરેક મુદ્દે પોતાની પત્ની સાથે વાતચીત અને ચર્ચા કરે છે. એટલે એમ પણ કહી શકાય કે પાકિસ્તાનના પીએમ પોતાની પત્નીને પૂછીને જ નિર્ણય લે છે. ઈમરાન ખાનનું આ નિવેદન એવા સમયે સામે આવ્યું છે જ્યારે બુશરા બેગમ પર પડદા પાછળ રહી સરકાર ચલાવવાના આરોપ લાગી રહ્યા છે.
એટલુ જ નહીં બુશરા બેગમ કાળા જાદુ કરતી હોવાના આરોપો પણ લાગી ચુક્યા છે.ઈમરાન ખાને જર્મનીની પત્રિકા ડેર સ્પીગલને આપેલા ઈન્ટરવ્યુમાં કહ્યું હતું કે, હું મારી પત્ની સાથે દરેક મુદ્દે ચર્ચા કરૂ છું. તેમાં સરકાર ચલાવતા આવતી મુશ્કેલીઓ પણ સામેલ છે. મહત્વનું છે કે આ પહેલા ઈમરાન ખાનની પાર્ટીની મહિલા સાંસદ ઉજ્મા કારદારની એક ઓડિયો ક્લીપ વાયરલ થઈ હતી જેમાં તે જણાવી રહી હતી કે પાકિસ્તાનનું સંચાલન ઇમરાન ખાનની પત્ની બુશરા બીબી જ કરી રહી છે.
