અરુણાચલ પ્રદેશના તિરપ જિલ્લાના ખોંસા વિસ્તારમાં સુરક્ષાદળોએ 6 ઉગ્રવાદીઓને એન્કાઉન્ટરમાં ઠાર કર્યા છે. સુરક્ષાદળોએ ઉગ્રવાદીઓની પાસેથી 6 રાઇફલ, કારતૂસ અને અન્ય હથિયારોનો જથ્થો પણ કબજે કર્યો છે. ઉગ્રવાદીઓ સાથેની અથડામણમાં અસમ રાઇફલ્સનો એક જવાન પણ ઘાયલ થયો છે.
મળતી માહિતી મુજબ, અરૂણાચલ પ્રદેશના ખોંસા વિસ્તારમાં શનિવારે સવારે સેનાએ આતંકવાદીઓ વિરૂદ્ધ મોટું ઓપરેશન ચલાવ્યું હતું. તિરપ જિલ્લામાં સેનાએ છ આતંકવાદી ઠાર માર્યા છે. આ બધા આતંકવાદી નગા ઉગ્રવાદી સંગઠનના સભ્ય હતા. મોતને ભેટેલા આતંકવાદીઓ પાસેથી ચીનમાં બનેલા હથિયાર મળી આવ્યા છે.
અરૂણાચલ પ્રદેશના ડીજીપી આર પી ઉપાધ્યાયએ આ અંગે જણાવ્યું કે પોલીસ અને અસમ રાઇફલ્સની જોઇન્ટ ટીમે શનિવારે સવારે લગભગ સાડા ચાર વાગે આતંકવાદીઓ વિરૂદ્ધ ઓપરેશન ચલાવ્યું હતું, જેમાં નગા ઉગ્રવાદી સંગઠનના 6 આતંકવાદી ઠાર માર્યા છે. તેમણે જણાવ્યું કે આતંકવાદીઓ સાથે અથડામણ દરમિયાન અસમ રાઇફલ્સનો એક જવાન પણ ઘાયલ થયો છે. આ આતંકવાદીઓ પાસેથી 4 AK-47 અને 2 ચાઇનીઝ એમક્યૂ મળી આવ્યા છે.
